சென்னை – தி.நகர் மணப்பேறு தரும் முப்பாத்தம்மன்!

-இரா.இரகுநாதன்சென்னையின் முக்கியப் பகுதியான தி.நகர் அன்று மாம்பலம் கிராமத்தின் ஒருபகுதியாக இருந்தது. அப்போது அங்கே மாமரங்கள் சூழ்ந்த ஓர் உன்னத இடத்தில் சுயம்புவாய் தோன்றியவளே முப்பாத்தம்மன். பன்னெடுங்காலம் கிராம தெய்வமாக, எல்லைக் காக்கும் அம்மனாகப் போற்றப்படுபவள். .வடக்கு நோக்கிய தெய்வம் வாழ்வருளும் என்ற சத்திய வாக்கினை உணர்த்தும் வகையில், வடக்கு நோக்கி திருக்கோவில் கொண்டு வணங்கிடும் பக்தருக்கெல்லாம் வாழ்வில் முன்னேற்றத்தைத் தருகிறாள் முப்பாத்தம்மன்.மூன்று கண்களைக் கொண்டு முக்காலமும் இந்தப் பூமியைக் காப்பதால் முப்பார்த்தம்மன் என்ற பெயர் பெற்று, அதுவே காலப்போக்கில் மருவி முப்பாத்தம்மன் ஆனது.முப்பாத்தம்மன் என்னும் சொல் மூப்பு என்னும் அடிச்சொல்லை ஒட்டி உருவானதாகும். மூப்பு என்னும் சொல் தலைமை, தொன்மை, முதுமை என்ற பொருள்களில் வழங்கப்படுகிறது. இந்துமத நம்பிக்கைப்படி, காளி என்றும் இளமையானவள்; ஆதலால் அவளை மூப்பு அற்ற அம்மன் என்ற பொருளில் மூப்பத்தம்மன் என்பதே முப்பாத்தம்மன் என மருவியதாக இன்னொரு தகவலும் சொல்லப்படுகிறது. .முப்போகம் விளையும் பூமியில் நின்று அருள்செய்யும் சக்தியை நமது முன்னோர், `முப்போகத்தம்மாள்' என்று பக்தியோடு வணங்கி வந்தனர். அவளே விளைச்சலுக்கு உரிய தேவியாக இருந்து, வேளாண் மக்களைப் பாதுகாத்து வந்தாள். காலப்போக்கில் முப்போகத்தம்மாள் என்பது மருவி `முப்பாத்தம்மாள்' என்று மாறினாள் என இன்னொரு வரலாறு தெரிவிக்கிறது.எல்லை தெய்வமாய் விளங்கும் அன்னை முப்பாத்தம்மன் வாழும் இந்தக் கோவிலை தாய் வீடாகக் கொண்டு இந்த எல்லைக்குள் உள்ள மற்ற அம்மன் கோவில்களிலிருந்து ஆடி மாதத்தில் பக்தர்கள் கூட்டமாக இங்கு வந்து வணங்கி கரகம் ஜோடித்து தங்களது அம்மனை மருளில் வரவழைத்து உத்தரவு பெற்று ஊர்வலமாக மேள தாளத்துடன் அழைத்துச் செல்வது வழக்கம். இச்செயல் முப்பாத்தம்மன் பழமையானவள், தலைமையானவள் என்பதற்குச் சான்றாக இருக்கிறது.ஒருகாலத்தில் மாம்பலம் என்று அழைக்கப்பட்ட இந்த இடம் நீர்வளமும், நிலவளமும் கொண்ட விவசாயப் பூமியாக இருந்து வந்துள்ளது. அப்போது அங்கிருந்த புற்றில் இருந்து வெளிப்பட்ட நல்லபாம்பு ஒன்று இங்கே கோவிலைக் கட்டக் கூறியதாகவும்; பின்னர் பெருவெள்ளத்தில் மிதந்து வந்த அம்மன் சிலை அந்த புற்றை வந்து அடைய, அதைக்கொண்டே ஆலயம் உருவானதாகச் சொல்லப்படுகிறது..ஆலய அமைப்பு:ஒரு பிராகாரம் கொண்டு சிறிய அளவிலேயே கோவில் அமைந்திருந்தாலும் எப்போதுமே பக்தர்கள் கூட்டம் அலைமோதுகிறது. கருவறையில் முப்பாத்தம்மன் சூலம், அங்குசம், கபாலம், டமருகம் ஏந்தி நான்கு கரத்துடன் இடக்காலை மடித்து வலக்காலை தொங்கவிட்டு காலடியில் அசுரனை மிதித்திருந்தாலும் கருணை பொங்கக் காட்சி தருகிறாள். .கருவறையைச் சுற்றி தனிச்சன்னதிகளில் கன்னிமூலை கணபதி, வள்ளி, தெய்வானை சமேத சுப்பிரமணியர், ஐயப்பன், ஜெய ஆஞ்சநேயர், நவகிரகங்கள், மகாகணபதி, மகாலிங்கம், விஷ்ணு துர்க்கை, தட்சிணாமூர்த்தி ஆகியோர் பரிவார தெய்வமாக அருளுகிறார்கள். தலவிருட்சம் வேப்பமரமாகும்.பிரமாண்ட புற்றைச் சுற்றிலும் நாகர் சிலைகள் அமைந்துள்ளன. நோய்நொடியால் பாதிக்கப்பட்டவர்கள், நாக தோஷம் உள்ளவர்கள், திருமண வரம், குழந்தை வரம் வேண்டுவோர் இந்தப் புற்றில் பால் ஊற்றி, மஞ்சள், குங்குமம் தெளித்து அம்மனை வேண்டிக்கொண்டு புற்றைச் சுற்றி வந்து வழிபட்டுப் பலன் பெறுகிறார்கள். வேண்டியவை யாவையும் நிறைவேற்றித் தரும் இந்த மங்கல நாயகியாம் முப்பாத்தம்மனை ஆடி மாதத்தில் வணங்குவது மிகச் சிறப்பானது..எலுமிச்சைக் கனியில் நெய் தீபமேற்றி செவ்வாய் அல்லது வெள்ளிக்கிழமைகளில் தொடர்ந்து ஒன்பது வாரங்கள் முப்பாத்தம்மனை வழிபட்டு வந்தால், விரைவில் மணப்பேறு, மகப்பேறு கிடைக்கப் பெறுவர் என்பது பக்தர்கள் நம்பிக்கை. ஞாயிறு, செவ்வாய், வெள்ளிக்கிழமைகள்; ஆடி, தை வெள்ளிக்கிழமைகள் மற்றும் விசேஷ நாட்களில் அம்மனுக்கு சிறப்பு அபிஷேகங்களும் பூஜைகளும் நடைபெறும்.சித்திரை வருடப்பிறப்பு, பெளர்ணமி, பங்குனி உத்திர நன்னாளில் அம்மனுக்கு 108 பால்குடங்கள், 108 இளநீர், 108 எலுமிச்சைப் பழங்களால் சிறப்பு அபிஷேகம் நடைபெறும். நவராத்திரியில் கோவிலில் கொலு கண்காட்சி மற்றும் கலைநிகழ்ச்சிகள் நடைபெறும். கார்த்திகை தீபத்திருநாளில் காலை அபிஷேகம், பூஜையுடன் மாலையில் சொக்கப்பனை ஏற்றுதல் சிறப்பான முறையில் நடைபெறும்..இந்தக் கோவிலில் ஆடித் திருவிழா இந்த வருடம் 15.8.2023, செவ்வாய்க்கிழமை அன்று மாலை 6.30 மணிக்குக் கொடியேற்றத்துடன் தொடங்கி, 16.8.2023, புதன்கிழமையன்று அம்மனுக்கு விசேஷ அபிஷேகமும் மஞ்சள் காப்பும், 17.8.2023, வியாழக்கிழமையன்று அம்மனுக்கு விசேஷ அபிஷேகமும் மா காப்பும், 18.8.2023, வெள்ளிக்கிழமையன்று அம்மனுக்கு விசேஷ அபிஷேகமும் சந்தனக்காப்பும், 19.8.2023 சனிக்கிழமையன்று அம்மனுக்கு விசேஷ அபிஷேகமும் விபூதிக்காப்பும், 20.8.2023, ஞாயிற்றுக்கிழமை கஞ்சி வார்த்தலும், மாலை வெள்ளிக்கவசம் சாத்துதலும், இரவு திருவீதி உலாவும் விமர்சையாக நடைபெற இருக்கிறது. மேலும் அடி பிரதட்சணம், அங்கபிரதட்சணம், பொங்கல் வைத்துப் படைத்தல், மாவிளக்கு ஏற்றுதல், கூழ் வார்த்தல், அன்னதானம் அளித்தல், உப்பு, மிளகு சேர்த்தல், மரத்தில் தொட்டில் கட்டுதல் போன்ற வேண்டுதல்களும் நடைபெறும்..எங்கே இருக்கு?சென்னை தி.நகர் பனகல் பூங்கா அருகே வடபழனி செல்லும் உஸ்மான் ரோட்டின் இடதுபுறம் மகாராஜபுரம் சந்தானம் சாலையில் முப்பாத்தம்மன் கோவில் கொண்டிருக்கிறாள்.தரிசன நேரம்காலை 5 - மதியம் 12; மாலை 4 - இரவு 9.