பெள்ளாதி: கஷ்டங்கள் போக்கும் கரியமாரியம்மன்!

-செ.சு.சரவணகுமார்வெற்றிலை பாக்கு பழங்கள் நிவேதனம் செய்து தெய்வத்தை பூஜிக்கிறோம். மகத்துவமிக்க வெற்றிலையை வைத்துச் செய்யும் வழிபாடும், பரிகாரமும் நமக்கு நிச்சயம் வெற்றியைக் கொடுக்கும். மற்ற இலைகளுக்கு இல்லாத சிறப்பு வெற்றிலைக்கு உண்டு..வெற்றிலையும், பாக்கும் மகாலட்சுமியின் அம்சம். வெற்றிலையின் நுனியில் லட்சுமியும், நடுவில் சரஸ்வதியும், காம்பில் பார்வதிதேவியும் இருக்கிறார்கள் என்பது ஐதிகம். இப்படிச் சிறப்பு வாய்ந்த வெற்றிலைக்குள் சுயம்புவாய் அம்பிகை வந்து நின்று அருள்பாலிக்கும் தலம், கோவை மாவட்டத்திலுள்ள பெள்ளாதி.காரமடை நகரின் மேற்கில் உள்ள கட்டாஞ்சி மலை, பெரியநாயக்கன்பாளையம் அருகில் உள்ள கோவனூர் மலை ஆகிய இடங்களில் இருந்து உற்பத்தியாகி சிற்றாறுகள் சங்கமிக்கும் இடம் வெள்ளாதி. கன்னட மொழி தாக்கத்தால் பிற்காலத்தில் பெயர் மருவி, தற்போது பெள்ளாதி என வழங்கப்படும் இவ்வூரில் சுமார் எழுநூறு ஆண்டுகளுக்கு முன்பு வெற்றிலை விவசாயம் செழித்திருந்தது. இங்கிருந்து அறுவடை செய்த வெற்றிலையைக் கூடையில் வைத்துச் சுமந்து கொண்டு சுற்று வட்டார ஊர்களுக்குச் சென்று வியாபாரம் செய்து வாழ்ந்து வந்தனர் விவசாயிகள்..அப்போது ஒருநாள் ஒரு பெண்ணும், அவரது கணவனும் அருகிலுள்ள சிறுமுகை என்ற ஊருக்கு வெற்றிலை வியாபாரத்திற்குச் சென்றனர். அன்றைய தினம் வியாபாரம் சுமாராகவே இருந்துள்ளது. மாலைப்பொழுதில் மீதி வெற்றிலையுடன் ஊர் திரும்பியுள்ளனர். வழியில் அப்பெண்ணின் தலை பாரம் அதிகமாகியுள்ளது. கூடையை இறக்கிப்பார்த்தபோது வெற்றிலைக்குள் நீளமாய் கல் ஒன்று இருந்துள்ளது. அது எப்படி வந்தது எனத் தெரியாமல் அதை எடுத்துக் கீழே வைத்துவிட்டு மீண்டும் தலையில் கூடையை வைத்து நடக்க ஆரம்பித்தனர். பெள்ளாதியை நெருங்க நெருங்க மீண்டும் தலைபாரம் அதிகமாகியுள்ளது. ஏற்கனவே வியாபாரம் சுமார் என்ற மனபாரம் அழுத்திக் கொண்டிருக்க, இது என்ன இப்படியொரு சோதனை என்று எண்ணியவாறு கூடையை இறக்கி வைத்துப் பார்த்தபோது இருவருக்கும் ஆச்சரியம். அவர்கள் கீழே வைத்த அந்த நீளமான கல் மீண்டும் வெற்றிலைக் கூடைக்குள் இருந்துள்ளது. குழம்பியபடி இருவரும் அக்கல்லை கூடைக்குள்ளே வைத்து பெள்ளாதிக்கு எடுத்துவந்தனர். அங்கு காரை மரங்கள் காணப்பட்ட இடத்தில் அந்த நீளமான கல்லை அச்சத்துடன் வைத்துவிட்டு நகர முற்பட்டபோது அசரீரியாய் பருவ வயதுப் பெண் குரல், “அச்சப்படாதீர்கள். கரிய மேகம் கூடி நிற்க முத்து முத்தாய் மழை பொழிபவள் நான். வெம்மையைப் போக்கிக் குளிர்ச்சியைத் தந்து இந்த மண்ணில் உயிர்களைக் காப்பவள். உங்கள் குறைகளையும், மனபாரங்களையும் தீர்த்தருள சக்தியின் வடிமாய் வந்துள்ள கரிய மாரி நான்!’’ என ஒலித்துள்ளது..பின்னர் ஊர் மக்களுக்கு இத்தகவல் சொல்லப்பட, நம் குறைகளைச் சொல்லி முறையிட்டால், அதை செவி கொடுத்துக் கேட்டுத் தீர்த்திட ஒரு பெண் தெய்வம் நமது ஊருக்கு வந்துவிட்டாள் என ஊர்ப் பெரியவர்கள் மகிழ்ந்து பச்சைப் பந்தல் போட்டு வழிபடத் துவங்கியுள்ளனர். பின்னர் அன்னையின் அருளாற்றல் சுற்று வட்டாரத்தில் உள்ள முப்பத்து மூன்று கிராமங்களுக்கும் பரவ, பக்தர்களும் பெருகியுள்ளனர். அவர்களுக்கு இஷ்ட தெய்வமாகவும், முக்கியமான பெண் தெய்வமாகவும் இருந்து காத்திட்டாள் இந்த கரியமாரி. பின்னர் கம்பீரமான ஆலயத்தை எழுப்பி, அழகிய சிலை வடித்து கருவறையில் பிரதிஷ்டை செய்துள்ளனர். சுயம்பு வடிவான அம்பிகையை சிலா ரூப அன்னையின் முன்பாக இருத்தியுள்ளனர்.திப்பு சுல்தானின் தென்னிந்தியா படையெடுப்பின் ஒரு பகுதியான மைசூர் போரின் போது இக்கோவில் அருகே ஒன்பது ஏக்கர் பரப்பில் கோட்டையைக் கட்டி இந்த அன்னையின் கோவிலுக்கு எந்த இடையூறும் இன்றித் தங்கியிருந்தாராம். திப்பு சுல்தான் காலத்தில் தூரத்தில் வரும் படையைப் பார்க்க அமைத்த ஏழு அடுக்குகள் கொண்ட படிக்கட்டு மேடை, பிரமிடு அமைப்பில் உள்ளதை இப்போதும் காண முடிகிறது. இங்கு கோட்டை இருந்ததனால் அம்மனின் திருநாமத்தின் முன்பு கோட்டை என்ற பெயர் சேர்ந்து கோட்டை கரியமாரியம்மன் என அழைக்கப்பெற்றாள். பல்வேறு காலகட்டங்களில் திருப்பணிகள் கண்ட இந்த ஆலயம், கடந்த இரு ஆண்டுகளுக்கு முன்பு விமரிசையாக கும்பாபிஷேக விழா கண்டுள்ளது..பெரிய நிலப்பரப்பில் பிரம்மாண்டமாய் வடக்கு நோக்கி அமைந்திருக்கும் ஆலயத்திற்குச் செல்லுகின்ற போது முதலில் தோரணவாயில், அடுத்து விநாயகப் பெருமானின் தனிச் சன்னதி அமைந்துள்ளது. சிறிது தூரம் நடந்தால் அழகிய சிறு மண்டபம். அதனைக் கடந்தால் ஊஞ்சல், சூலாயுதம், பலிபீடம் இருக்கின்றன. அதனைத் தாண்டி அர்த்த மண்டபத்தினுள் நுழைந்தால் சூலாயுதம், பலிபீடம், சிம்ம வாகனம் அமைந்துள்ளது. கருவறைக்கு வெளியே ஒருபுறம் விநாயகரும், மற்றொரு புறம் முருகனும் அருள்பாலிக்கின்றனர்.கருவறையில் கோட்டை கரியமாரியம்மன் பேரழகியாக எழுந்தருளியுள்ளாள். நின்ற திருக்கோலம். இவளைத் துதிப்பவர்களின் நோய் நொடிகள் விலகிவிடும். இல்லத்தில் தீய சக்திகள் ஓடிவிடும். கஷ்டங்கள் காணாமல் போகும் என்பது நிச்சயம். கோஷ்டத்தில் துர்க்கையும், சாமுண்டியும் அருள்கின்றனர். கரியமாரியம்மனின் கருவறைக்கு வலது பகுதியில் லட்சுமியையும், இடது பகுதியில் சரஸ்வதியையும் தனித்தனி சன்னதிகளில் பிரதிஷ்டை செய்து வழிபட்டு வருகின்றனர். தனித்தனி மூலஸ்தானத்தில் முப்பெரும் தேவியர் அருள்பாலிப்பது இத்தலத்திற்கு மேலும் சிறப்பு சேர்க்கிறது.இவ்வூருக்குச் சற்றுத் தொலைவில் வேப்ப மரமும், காரை மரமும் அருகருகே இருக்க, அங்கு காவல் தெய்வமான கோட்டை முனியப்பன் தனி ஆலயத்தில் அருள்பாலிக்கின்றார். இவர் சன்னதி முன்பு மகான், கன்னிமார் தெய்வங்கள் தரிசனம் தருகின்றனர். குதிரை வானங்களும், நாய் வாகனங்களும், காவல்காரர்களும் சுதை வடிவத்தில் காட்சி தருகின்றன. .தினந்தோறும் காலை சிறப்பு பூஜை நடைபெறுகிறது. வெள்ளிக்கிழமை, பௌர்ணமி, அமாவாசை போன்ற முக்கிய விரத தினங்களில் இங்கு விசேஷ வழிபாடுகள் நடைபெறுகின்றன. கோட்டை கரியமாரியம்மனுக்கு அமாவாசை வழிபாடு திருவிழா போல் நடைபெறுகிறது. மதியம் 12 மணிக்கு கணபதி வழிபாடு முதலில் தொடங்குகின்றது. பின்னர் இந்த ஆலயத்தின் அருகே காவல் தெய்வமாய் அருள்பாலிக்கும் கோட்டை முனியப்பனுக்கு சிறப்பு பூஜைகள் செய்கின்றனர். அவர் தோளின் மீது சாட்டையையும், கீழே வேப்பிலையையும் வைத்து வழிபாடு நடத்துகிறார்கள். அதன் பின் காரை மரத்தடியில் உள்ள தெய்வத்திற்கும், குதிரை வாகனத்திற்கும் பூஜை முடிய பக்தர்களில் ஒரு சிலருக்கு அருள் வந்துவிட அம்மன் அழைப்பு மேள, தாளத்துடன் நடைபெறுகிறது. அழைத்து வரப்படும் அம்மன், கோவிலை வலம் வந்து ஆலயத்தினுள் நுழைந்த பின்னர் சிறப்பாக கோட்டை கரியமாரியம்மனுக்கு தீபாராதனை காண்பிக்கப்படுகிறது. அப்போது திரண்டு நிற்கும் பெண் பக்தைகள் ஓம் சக்தி பராசக்தி என பக்தி உணர்வுடன் சொல்லும் காட்சியைக் காணும்போது மெய்சிலிர்க்கும். அத்தருணத்தில் அந்த அன்னையே தொட்டு ஆசிர்வதித்த உணர்வு நமக்கு ஏற்படும். இந்த அமாவாசை வழிபாட்டில் கலந்துகொள்பவர்களுக்கு வாழ்வில் முன்னேற்றம் ஏற்படுவதுடன்; பில்லி, சூனியம், ஏவல், செய்வினைக் கோளாறுகள், ஆவிகள் போன்ற தீய சக்திகளால் ஏற்பட்ட பாதித்தவர்கள் விலகும் என்கின்றனர் இங்கு வரும் பக்தர்கள்.புரட்டாசி மூன்றாம் சனிக்கிழமை நாளில் காலை பால் குடம், தீர்த்தக் குடம் எடுத்து மேள, தாளங்களுடன் அம்மன் அழைப்பு நடக்கின்றது. அதைத் தொடர்ந்து அபிஷேக, அலங்கார பூஜை முடிந்து தீபாராதனை காண்பிக்கப்படுகிறது.சரஸ்வதி பூஜை திருநாளன்று காலை முப்பெரும் தேவியர்களுக்கும் சிறப்பு வழிபாடுகள் நடக்கின்றன. அன்றைய தினம் சுற்று வட்டாரத்தில் உள்ள பெற்றோர்கள் தங்கள் குழந்தைகளை அழைத்து வந்து அவர்களுக்கு சிறந்த கல்வி ஞானம் வேண்டி கலைமகளை பூஜிக்கின்றனர். பின் ஒரு வெள்ளைத் தாளினையும், பேனாவையும் தங்கள் குழந்தையிடம் தந்து முதன் முதலாக எழுதிப் பழக்குகின்றனர். அதைத் தொடர்ந்து அவர்களை மழலையர் பள்ளியில் சேர்க்கின்றார்கள். கல்வியில் ஏற்றம் பெறாத குழந்தைகளை இத்தலத்திற்கு அழைத்து வந்து பூஜித்தால், பிரார்த்தனையின் பலனாக நினைவாற்றல் அதிகரிப்பதோடு, கல்வியில் நாட்டம் அதிகரித்து மந்தமான புத்தி படைத்த குழந்தைகள் சுறுசுறுப்பும், புத்திசாலித்தனமும் பெறுகிறார்களாம். தீபாவளி திருநாள் அன்று அதிகாலை முப்பெரும் தேவியர்களுக்கும் சிறப்பு பூஜைகள் நடக்கின்றன..சித்திரை மாதம் ஆரம்பித்து வைகாசி மாதம் வரை மாபெரும் பூச்சாட்டு திருவிழா விமரிசையாகக் கொண்டாடப்படுகிறது. விழா ஆரம்பத்தின் போது வெற்றிலையில் வந்த அன்னைக்கு வெற்றிலைத் தாம்பூலம் மற்றும் சோளப்பொரி அடங்கிய சீர்வரிசை பண்டைய கால முறைப்படியே கொண்டு வருகின்றனர். அம்மன் அழைப்பு, அபிஷேக அலங்கார பூஜை, மாவிளக்கு எடுத்து வருதல், பொலி எருது பிடித்தல், மஞ்சள் நீராடுதல், மறு பூஜையென 23 நாட்கள் நடைபெறும் வைபவங்களுக்கு ஒவ்வொரு கிராமப் பெரியவர்களும் கட்டளைதாரர்களாக இருந்து சிறப்பிக்கிறார்கள். அக்காலத்தில் 33 கிராம மக்களும் இவ்விழாவில் பங்கெடுத்துச் சிறப்பிப்பார்களாம். தற்போது இந்த அன்னையைப் போற்றி வழிபடுவோர் 100 கிராமங்களுக்கு மேல் பரவியுள்ளனராம்.ஆடி மாதம் நான்கு வெள்ளிக்கிழமைகளில் சிறப்பு பூஜைகளும், ஐந்தாவது வெள்ளிக்கிழமை மாலை திருவிளக்கு பூஜையும் விமரிசையாக நடக்கின்றன. இதில் பங்கேற்ற பெண்களுக்கு தாலிக்கயிறு, வளையல், ரவிக்கைத் துணியும், பக்தர்களுக்கு பிரசாதமும் வழங்கப்படுகின்றன. காத்திகை தீபம், வரலட்சுமி நோன்பு ஆகிய விரத தினங்களில் சிறப்பு வழிபாடு நடைபெறுகிறது.நீங்களும் குடும்பத்தோடு இத்தலம் வந்து தரிசித்து கல்வி, செல்வம், வீரம் ஆகிய முப்பெரும் வரங்களைப் பெற்றிடுங்களேன்!எங்கே இருக்கு?கோவை மாவட்டம், மேட்டுப்பாளையம் - அன்னூர் சாலையில் 4 வது கி.மீ.யில் தென்திருப்பதி நால்ரோடு என்ற பேருந்து நிறுத்தத்தில் இறங்கி ஒரு கி.மீ. நடந்தால் இக்கோவிலை அடையலாம். ஆட்டோ வசதியும் உள்ளது.தரிசன நேரம்காலை 6 – பகல் 12; மாலை 4 – இரவு 7.