பக்தி செய்தி: கந்தனுக்கு அரோகரா! காந்திக்கு ஜே ஜே!

கன்னியாகுமரி, திருநெல்வேலி, தூத்துக்குடியைச் சேர்ந்த முருக பக்தர்களின் தாய்வீடு திருச்செந்தூர். நேர்த்திக்கடன் தீர்க்க மொட்டையடிப்பதில் தொடங்கி, குழந்தைகளுக்கு காது குத்துதல், முதல் மொட்டை என சகலத்திலும் தென் மாவட்ட முருக பக்தர்களின் வாழ்வில் இரண்டறக் கலந்தது திருச்செந்தூர். இத்தல முருகப்பெருமானுக்கும் சுதந்திர வேள்விக்கும் சுடராய் ஒளி வீசிய தன்மை உண்டு. திருச்செந்தூரில் நடக்கும் வைகாசி விசாகம் பெருந்திருவிழாவையொட்டி குமரி, நெல்லை, தூத்துக்குடி மாவட்டங்களின் பல்வேறு பகுதிகளில் இருந்து புறப்பட்டுச் செல்லும் காவடிகள்தான் சுதந்திர வேள்விக்கு நெய் ஊற்றிய பங்களிப்பையும் செய்துள்ளன. இப்போதும் வருடத்துக்கு இருமுறை குமரி மாவட்டத்தில் இருந்து பல்வேறு ஊர்கள், குழுக்கள், முருகனடியார் நற்பணி மன்றத்தினர் என பலரும் கூட்டங்கூட்டமாக திருச்செந்தூரை நோக்கிக் காவடி சுமந்து சென்று கொண்டிருக்கிறார்கள். இன்றளவும் அவர்கள் அவரவர் ஊரில் இருந்து காவடி எடுத்து திருச்செந்தூர் கோயிலுக்கு பாத யாத்திரையாகச் சென்று மூலவருக்கு அபிஷேகம் செய்து ஊர் திரும்புகிறார்கள். அதன்பின்னர் இடும்பன் பூஜை கொடுத்துப் பின்னர் இவ்விழா நிறைவுபெறுகிறது.கன்னியாகுமரி மாவட்டத்தில் நடந்துவரும் சூரசம்ஹாரம், கிருத்திகை, பங்குனி உத்திரம், வைகாசி விசாகம், கந்தர் சஷ்டி விழாக்கள் குறித்து முதலியார் ஓலைச் சுவடிகளிலும், அப்போதைய ஆங்கிலேயர் ஆட்சிக் காலத்தில் குமரி மாவட்ட நிர்வாக ஓலைகளிலும் காணப்படுகிறது.சுதந்திரப் போராட்டக்காலத்தில், அதாவது 1940-ஆம் ஆண்டின் பிற்பகுதியில், ஒரு காவடிக்குழு காவி வேட்டி கட்டிய பக்தர்களோடு சிலர் கதர் வேட்டியும் கட்டியபடி காவடி சுமந்து, நாகர்கோவிலிலிருந்தும், குமரியிலிருந்தும் பொடிநடையாய் திருச்செந்தூர் வரை நடந்துகொண்டே கந்தனுக்கு அரோகரா, குமரனுக்கு அரோகரா, செந்தில்வேலனுக்கு அரோகரா என்ற கோஷத்தோடு ‘வந்தேமாதரம்’ என்றும் ‘மகாத்மா காந்திக்கு ஜே’ என்ற கோஷமும் போட்டபடி சென்றுள்ளனர். இந்தப் பயணத்தில் ஏராளமான ஆண்களும் பெண்களும் கலந்து கொண்டனர். இதை ’மகாத்மா காந்தி வழி நடைசிந்து’ என்னும் பெயரில் இதை சுதந்திர வேள்வியின் ஒரு அங்கமாகச் செய்துள்ளனர்.இதேபோல் திருச்செந்தூர் முருகப்பெருமானை மையப்படுத்தி குமரியில் நடந்துவரும் ‘காவடிச்சீட்டு’ மிகவும் பிரசித்தி பெற்றது. பால்காவடி, பன்னீர்க்காவடி, புஷ்பக் காவடி, சர்ப்பக் காவடி மற்றும் அலகு குத்தல் என பக்தியின் வீச்சும் திருமுருகனின் அருளும் சேர்ந்து அருள்மழை பொழிந்துள்ளன.கன்னியாகுமரியில் காவடி கட்டிச் செல்பவர்கள் ஒன்று சேர்ந்து ஊருக்கு ஊர் நற்பணி மன்றங்களையும் பஜனை மடங்களையும் நிறுவினர். எதையும் எதிர்பாராமல் லாபநோக்கின்றி ‘காவடிச்சீட்டு’ நடத்தினர். இதில் சீட்டு விழுபவர் ‘காவடி’ எடுக்கவேண்டும் என்பது நிபந்தனை. இதற்கு காவடிக் குழுவில் இருக்கும் அன்பர்களின் பெயரை எழுதிப்போட்டு, ஒரு குழந்தையை அழைத்து எடுக்கச் செய்வார்கள். காவடிச்சீட்டு விழுந்தவர் வைகாசி விசாகத்தன்று காவடியுடன் திருச்செந்தூர் செல்லும் முருக பக்தர்களுக்கு உணவு, மாலைகள், காவடியை அலங்கரிக்க உரிய பொருட்கள் ஆகிய செலவினங்களை ஏற்கவேண்டும். முருகனுக்குக் காவடி எடுக்கும் காலத்தில் பஜனை மடங்களே செயல்பட்டன. திருவிழா இல்லாத காலங்களில் இம்மடங்கள் நூலகங்களாகவும், வழிப்போக்கர்கள் அல்லது யாத்ரீகர்கள் தங்குமிடங்களாகவும் இருந்தன.- ஆர். சந்திரிகா

பக்தி செய்தி: கந்தனுக்கு அரோகரா! காந்திக்கு ஜே ஜே!

Related Stories