திருவரங்கப்பெருமாள் அரையர்... அபிநயத்தால் மனம் கவர்ந்த அரையர்!

-சந்தான கிருஷ்ணன்எம்பெருமானார் என்று அழைக்கப்படும் ஸ்ரீராமாநுஜரைப் பஞ்சாசார்ய பதாச்ரிதர் என்று அழைப்பர். ஐந்து ஆசாரியர்களிடமிருந்து ஆன்மிகத் தத்துவங்களைப் பாடம் கேட்டு அறிந்தவர் என்பது அதன் பொருளாகும். பெரியநம்பிகள், திருக்கோட்டியூர் நம்பிகள், திருவரங்கப்பெருமாள் அரையர், திருமாலையாண்டான், பெரியதிருமலை நம்பிகள் ஆகியவர்களே அந்த ஐந்து ஆசாரியர்கள் ஆவர்.இவர்களுள் திருவரங்கப்பெருமாள் அரையர் ஸ்ரீராமாநுஜருக்கு திவ்வியப்பிரபந்தங்களையும் சம்பிரதாய விளக்கங்கள் சிலவற்றையும் உபதேசித்தார். ஸ்ரீஆளவந்தாரின் திருக்குமாரராகிய இவர் திருவரங்கத்தில் வைகாசி மாதம், கேட்டை நட்சத்திரத்தில் அவதரித்தார்.ஸ்ரீரங்கத்தில் எழுந்தருளியுள்ள பெரியபெருமாளிடம் மிகுந்த பக்தி கொண்ட திருவரங்கப்பெருமாள் அரையர் திவ்வியப் பிரபந்தப் பாசுரங்களை அபிநயத்துடன் பக்திரசம் சொட்டப் பாடுவதில் வல்லவராவர்.ஒருமுறை, ஸ்ரீஆளவந்தார் முன்னிலையில், திருவனந்தபுரம் ஸ்ரீஅனந்தபத்மநாபஸ்வாமி குறித்த நம்மாழ்வாரின் பாசுரத்தை அபிநயித்தபடி, “நடமினோ நமர்கள் உள்ளீர்!” என்று இவர் பாடியதைக் கேட்ட ஸ்ரீஆளவந்தார் அப்பொழுதே திருவனந்தபுரம் நோக்கிப் பயணிக்கத் தொடங்கிவிட்டாராம்.அரையரின் அபிநயத்தில் ஆசாரியர் மயங்கியதைப் போல ஆண்டவனும் மயங்கிய நிகழ்வு ஒன்றும் பிற்காலத்தில் அரங்கேறியது.ஆம்.ஸ்ரீஆளவந்தார் முக்தியடைந்த பின்னர் திருவரங்கம் திருக்கோயில் நிர்வாகத்துடன் ஸ்ரீவைஷ்ணவர்களை வழிநடத்தும் பெரும் பொறுப்பையும் ஸ்ரீராமாநுஜரே ஏற்றுக்கொள்ளவேண்டும் என்பது அனைவரின் விருப்பமாக இருந்தது. ஆனால், ஸ்ரீராமாநுஜரோ காஞ்சிபுரத்தில் வசித்துவந்ததுடன் அங்கு எழுந்தருளியுள்ள ஸ்ரீவரதராஜரிடம் பெரும் பக்தியுடன் தொண்டுபுரிந்து வந்தார். பெருமாளுக்கும் அவரிடம் மிகவும் பிரியம் இருந்தது.“காஞ்சிபுரத்தை விட்டு ஸ்ரீராமாநுஜர் நிரந்தரமாக ஸ்ரீரங்கத்துக்கு வந்துவிடுவாரா? அப்படியே அவர் வருவதாக இருந்தாலும் ஸ்ரீவரதராஜப் பெருமாள் அவரை அனுப்பச் சம்மதிப்பாரா?” என்றெல்லாம் ஸ்ரீரங்கவாசிகள் தயங்கினர். ஆனாலும் அவர்கள் திருவரங்கப்பெருமாள் அரையரின் திறமையில் நம்பிக்கை வைத்து அவரைக் காஞ்சிபுரத்திற்கு அனுப்பிவைத்தனர். அவர்களது நம்பிக்கை வீண்போகவில்லை.காஞ்சிபுரம் சென்ற திருவரங்கப்பெருமாள் அரையர் அங்குள்ள வரம்தரும்பெருமாள் அரையர் என்பவரையும், திருக்கச்சிநம்பிகளையும் உடன் அழைத்துக்கொண்டு ஸ்ரீபெருந்தேவித் தாயார் உடனுறையும் ஸ்ரீவரதராஜப் பெருமாளை மங்களாசாஸனம் செய்தார்.அப்பொழுது ஆழ்வார்களின் ஈரத்தமிழ்ப் பாசுரங்களை பக்திரசம் சொட்டச் சொட்ட அபிநயத்துடன் அவர் பாடியதைச் செவிமடுத்த ஸ்ரீவரதராஜப்பெருமாள், “அரையரே, நீர் வேண்டுவதைக் கேளும்!” என்றார்.“ஸ்ரீராமாநுஜரை அடியேனுடன் ஸ்ரீரங்கத்திற்கு அனுப்பிவைக்க வேண்டும்!” என்று அரையர் சொன்னதைக் கேட்டு திகைத்த ஸ்ரீவரதராஜப்பெருமாள் முதலில் சற்றுத் தயங்கினாலும், வாக்குக் கொடுத்ததை மீற முடியாமல் சம்மதித்து விட்டார்.யாரும் இழக்க விரும்பாத பெரும் செல்வமாகிய ஸ்ரீராமாநுஜரை இப்பெருமாள் தியாகம் செய்வதற்கு திருவரங்கப்பெருமாள் அரையரின் கானமே வழிவகை செய்தது. திருவரங்கப்பெருமாள் அரையரின் அவதாரத் திருநாள் வரும் 4.6.2023 (வைகாசி 21) அன்று அமைகின்றது.

திருவரங்கப்பெருமாள் அரையர்... அபிநயத்தால் மனம் கவர்ந்த அரையர்!

Related Stories