|
பழமை...!
கை...கம்ப்யூட்டரின் ‘மவுசில்’ இருந்தாலும்
கணக்குப் பிள்ளையின் காதில் இன்னும் கம்பீரமாய் வீற்றிருக்கிறது... பேனா...!
- இளங்கோ, மகராஜநகர்.
பர்சேஸ்!
புடவை வாங்கிப் போனேன் அம்மாவுக்கு.
வாங்கிக் கட்டிக்கொண்டேன் மனைவியிடம்.
- வசீகரன், தேனாம்பேட்டை.
ஞாபக மறதி!
குரங்காட்டியின் -
கோல் பிடித்துத் தாண்டும் குரங்கிற்கு
நினைவில் இல்லை -
தான் ஒரு கடல் தாண்டிச் சென்ற கதையும்
ஒரு நகரம் அழித்த கதையும்.
576
வாலை ஆட்டியும், காலை நக்கியும்
மிருகங்கள் சொல்லிவிடும் பிரியத்தை
ஏனோ சொல்லத் தெரிவதில்லை நமக்கு
எத்தனை மொழியிருந்தும்.
- ரமேஷ் அனந்தபத்மநாபன்,
மயிலாடுதுறை.
கிளி!
மயிலுக்குப்பதில் கிளியை
தேசியப்பறவையாக்கி யிருக்கலாம்!
அலகில் ஆரஞ்சு நிறம்
பேச்சில் வெள்ளை
மேனியில் பச்சை
கண்கள் கருநீல அசோகச் சக்கரம்!
பின் ஏன் விட்டுவிட்டார்கள்?
ஒருவேளை -
தேசிய ரகசியத்தைப் பாதுகாக்காது
உளறிவிடும் என்று
ஒதுக்கியிருப்பார்களோ?!
விபத்து!
நெரிசல்மிக்க சாலை நடுவே
நசுக்கப்பட்டு கசங்கிக் கிடந்தது
நர்சரி குழந்தை
ஆட்டோவிலிருந்து
தவறவிட்டிருந்த பிஸ்கட் பாக்கெட்!
- வளர்கவி, கோவை-22. | 
Rss
